Janë mbyllur 45 minutat e para në dy çerekfinalet e kthimit të UEFA Champions League, duke dhuruar emocione dhe ritëm të lartë në të dyja përballjet.
Në stadiumin Metropolitano Stadium, Barcelona ka mbyllur pjesën e parë në avantazh 1-2 ndaj Atlético Madrid. Katalanasit e nisën vrullshëm ndeshjen, duke kaluar në epërsi që në minutën e 4-t me anë të Lamine Yamal, i cili përfitoi nga një gabim në mbrojtje dhe asist i Ferran Torres.
Dominimi i miqve u konkretizua sërish në minutën e 24-t, kur këtë herë ishte vetë Torres që shënoi pas një aksioni të ndërtuar bukur dhe asistit të Dani Olmo. Megjithatë, vendasit reaguan shpejt dhe në minutën e 31-të ngushtuan diferencën me Ademola Lookman, pas një kundërsulmi të shpejtë të finalizuar me asistin e Marcos Llorente.
Ndërkohë, në Anfield, sfida mes Liverpool dhe Paris Saint-Germain është mbyllur në barazim pa gola në pjesën e parë.
Rasti më i rrezikshëm për parisienët erdhi në minutën e 17-të, kur Ousmane Dembélé goditi mbi traversë. Nga ana tjetër, “The Reds” iu afruan golit në minutën e 31-të me Milos Kerkez, por portieri Matvey Safonov reagoi në mënyrë spektakolare.