Aksidenti tragjik i Diogo Jota-s mund të jetë shkaktuar nga shpërthimi i gomës

Bota e futbollit është tronditur nga një lajm tragjik: Diogo Jota, sulmuesi i Liverpool-it dhe i kombëtares portugeze, së bashku me vëllanë e tij André Silva (André Felipe), kanë humbur jetën këtë mëngjes në një aksident automobilistik të ndodhur në Zamora, Spanjë. Lajmi është konfirmuar nga Guardia Civil për Sky Sports News, duke sjellë trishtim të thellë në gjithë komunitetin sportiv dhe në veçanti atë portugez.

Sipas autoriteteve spanjolle, aksidenti ndodhi në orën 00:30 të mëngjesit (02:30) në kilometrin 65 të autostradës A-52, në komunën Cernadilla, provinca Zamora.

Në një deklaratë zyrtare të policisë spanjolle për mediat britanike, thuhet: “Një automjet doli nga rruga dhe të gjitha të dhënat tregojnë për një shpërthim të gomës gjatë një manovre parakalimi.”

Pas incidentit, makina mori flakë, duke mos lënë mundësi shpëtimi për personat brenda saj. Të dy viktimat u dogjën për vdekje në vend.