Arbeloa: E kuptoj vendimin e klubit, por nuk e kuptoj vendimin e gjyqtarit!

Trajneri i Real Madrid, Alvaro Arbeloa, doli në konferencë për shtyp pas eliminimit nga UEFA Champions League, pas humbjes 4-3 ndaj Bayern Munich në ndeshjen e kthimit të çerekfinales, ndërsa bavarezët kishin fituar 2-1 edhe takimin e parë.

“Jam shumë krenar për lojtarët, tifozët dhe të gjithë ata që na mbështetën. Ajo që më dhemb më shumë është se këtë vit nuk do të arrijmë titullin e 16-të, sidomos për mënyrën si ndodhi eliminimi,” deklaroi Arbeloa.

Ai theksoi se kishte zgjedhur formacionin më të mirë për të fituar: “E dija që Bayerni do të na vinte në vështirësi me stilin e tyre. Do të bëja sërish të njëjtat zgjedhje. Lojtarët treguan karakter të madh në një stadium të vështirë. Fatkeqësisht nuk shfrytëzuam rastet, dhe futbolli vendoset nga efikasiteti para portës.”

Trajneri madrilen u ndal edhe te arbitri, duke kritikuar kartonin e kuq ndaj Eduardo Camavinga: “Ka një ndjenjë padrejtësie dhe zemërimi. Vendimi nuk kuptohet nga askush. Mendoj se arbitri u ndikua nga protestat e lojtarëve të Bayern-it. Është një gabim i dyfishtë”.

Arbeloa shtoi se skuadra është shumë e zhgënjyer: “Dhimbja është e madhe për mënyrën si ndodhi. Megjithatë, tifozët duhet të jenë krenarë sepse lojtarët dhanë gjithçka në fushë.”

Në fund, ai foli edhe për të ardhmen: “Nuk jam i shqetësuar për të ardhmen time. Jam pjesë e këtij klubi dhe do të pranoj çdo vendim. Më intereson vetëm që Real Madridi të fitojë, pavarësisht se kush është në stol.”