Barazoi rekordin e Gerd Muller, Lewandowski: Krenar që po shkruaj historinë!

Robert Lewandowski barazoi sot rekordin e legjendës Gerd Muller. 40 gola sezonale në Bundesligë për sulmuesin e Bayern Munchen, i cili ka edhe një ndeshje në dispozicion për t’i përmirësuar shifrat e tij të jashtëzakonshme.

Sulmuesi 32-vjeçar ka reaguar me anë të një postimi në “Instagram”, aty ku shpreh emocionet e mëdha dhe falënderon Bayern Munchen.

“Arrita një objektiv që dukej i pamundur po ta imagjinoje kohë më parë. Jam tepër krenar që kam shkruar historinë me Bayern Munchen dhe që jam një nga protagonistët e një përralle që tifozët do ua tregojnë djemve të tyre, duke ndjekur gjurmët e një legjende si Gerd Muller.

Rekordet individuale bëhen të mundura falë shokëve të skuadrës, dua të falënderoj edhe stafin teknik. Unë kam gjithmonë pritshmëri të mëdha nga vetja, dua të thyej çdo barrierë. Ky është stili im, faleminderit që besuat tek unë“, shkroi sulmuesi polak.