Real Madrid po mban nën vëzhgim të vazhdueshëm situatën kontraktuale të Dayot Upamecano, mbrojtësit francez që aktivizohet me Bayern Munich. Sipas raportimeve të Sky Sport, “Los Blancos” kanë shprehur një interes konkret për 25-vjeçarin, por deri më tani nuk ka pasur asnjë marrëveshje verbale mes palëve.
Pavarësisht interesimit nga Madridi, prioriteti i Upamecanos mbetet qëndrimi në Bavari. Ai konsiderohet një përbërës thelbësor në skemën e trajnerit Vincent Kompany, i cili e sheh si liderin e mbrojtjes për vitet e ardhshme.
Negociatat midis përfaqësuesve të lojtarit dhe drejtuesve të Bayern po ecin në mënyrë pozitive, megjithëse ende nuk është firmosur zyrtarisht marrëveshja e re.
Sipas burimeve afër klubit, opsioni më i mundshëm është një kontratë e re deri në vitin 2030 ose 2031, me një pagë që mund të arrijë në 20 milionë euro bruto në sezon, një rritje e ndjeshme krahasuar me marrëveshjen aktuale.
Nga ana tjetër, Real Madrid po e ndjek me kujdes zhvillimin e situatës. Klubi spanjoll është gati të ndërhyjë në rast se negociatat mes Bayern dhe Upamecano do të hasin në pengesa. Skuadra e Carlo Ancelottit e sheh francezin si një përforcim strategjik për mbrojtjen, sidomos nëse në verën e ardhshme largohet ndonjë prej titullarëve aktualë.