David zbarkon në Itali, bomberi gati të kryejë vizitat mjekësore

Jonathan David ka mbërritur në Itali dhe është gati të bëhet zyrtarisht lojtari më i ri i Juventusit. Sulmuesi kanadez, i lindur në vitin 2000, ka zbritur në aeroportin e Malpensës dhe është nisur menjëherë drejt qendrës sportive të Juventusit në Continassa për të kryer vizitat mjekësore dhe për të firmosur kontratën.

Pas disa ditësh negociatash intensive, marrëveshja është mbyllur me sukses. David do të firmosë një kontratë pesëvjeçare, e vlefshme deri më 30 qershor 2030, dhe do të përfitojë një pagë prej 6.5 milionë euro neto në sezon.

Në kontratë janë përfshirë bonuse të ndryshme, përfshirë një shtesë në rast fitoreje të titullit kampion dhe një shumë totale prej 15 milionë eurosh si komision për agjentët dhe si shpërblim në momentin e firmës.

25-vjeçari vjen te “Zonja e Vjetër” si lojtar i lirë, pasi përfundoi kontratën me Lille, klub ku shënoi 109 gola në 232 ndeshje dhe u bë një prej emrave më të përfolur në merkato. Megjithëse kishte interes nga shumë klube të mëdha evropiane, David zgjodhi projektin e Juventusit dhe teknikun Igor Tudor si hapin e radhës në karrierën e tij.

Në total, investimi i Juventusit për David do të arrijë rreth 75 milionë euro për 5 vite, ose 15 milionë euro në vit, përfshirë pagën, bonuset dhe komisionet.