Trajneri i Spanjës, Luis de la Fuente, ka deklaruar se gjysmëfinalja e Kupës së Botës ndaj Francës do të jetë një përballje e ekuilibruar, duke theksuar se të dyja skuadrat kanë evoluar ndjeshëm dhe se e kaluara nuk do të ketë ndikim në këtë duel. Në një intervistë për “Cadena Ser”, tekniku spanjoll vlerësoi maksimalisht Francën, të cilën e cilësoi si një nga pretendentet kryesore për fitimin e trofeut.
“Të arrish në gjysmëfinalen e një Botërori është jashtëzakonisht e vështirë. Të gjithë kundërshtarët janë të një niveli shumë të lartë, por edhe ne kemi një skuadër shumë të fortë. Kualifikimi për në finale është plotësisht i hapur”, u shpreh De la Fuente.
Trajneri spanjoll shtoi se ndeshja nuk do të ngjasojë me përballjet e mëparshme mes dy ekipeve, pasi si Spanja ashtu edhe Franca janë përmirësuar ndjeshëm.
“Duke parë mënyrën se si kanë evoluar të dyja skuadrat, kjo ndeshje nuk do të ketë asgjë të përbashkët me ato të së kaluarës”, deklaroi ai.
De la Fuente u ndal edhe te talenti i ri Lamine Yamal, për të cilin beson se nuk ka treguar ende maksimumin në këtë Botëror.
“Jam i bindur se ndeshja e tij më e mirë në këtë Kupë Bote ende nuk ka ardhur. Ai është jashtëzakonisht i motivuar dhe ka shumë dëshirë për të bërë mirë. Ne vetëm duhet të menaxhojmë pak entuziazmin e tij. Po kalon një proces natyral rritjeje dhe pjekurie”, tha trajneri.
Fjalë vlerësuese pati edhe për kapitenin Rodri, të cilin e cilësoi si pikën kyçe të skuadrës.
“Ai është një lojtar shumë i rëndësishëm, referenca e ekipit dhe futbollisti më i mirë në botë në rolin e tij”, theksoi De la Fuente, duke mos lënë pa përmendur edhe cilësitë e mesfushorëve Pedri, Fabián Ruiz dhe Martín Zubimendi.
Në fund, trajneri spanjoll dha lajme pozitive edhe për gjendjen fizike të Nico Williams dhe Víctor Muñoz, duke bërë të ditur se të dy janë rikuperuar plotësisht dhe mund të jenë një opsion për sfidën ndaj Francës.