De Ligt: Ka shumë konkurrencë për titullin, Pirlo ka qenë frymëzim për mua!

Matthijs de Ligt në një intervistë të dhënë së fundmi për “Sky Sport” ka folur për duelin për titull. Mbrojtësi holandez ka evidentuar se tashmë është përshtatur me futbollin italian.

“Këtë vit do të jetë më e vështirë, ka shumë konkurrencë, jemi ne, Inter, Milan, Roma, Lazio, Atalanta, të gjithë janë në garë. Është një kampionat i bukur për tifozët, sepse gjithmonë ka ndeshje të bukura. Juventus është gjithmonë mes favoritëve, kemi humbur disa pikë ndaj ekipeve të vogla, sepse po i përshtateshim lojës së Pirlos. Tani po rritemi dhe jemi mirë.

Seria A më ka përmirësuar taktikisht. Tani i njoh më mirë lojtarët, është më e thjeshtë. Dua të përmirësohem gjithmonë e më shumë. Nga Bonucci dhe Chiellini marrë vizionin e lojës dhe markimin”, deklaroi holandezi.

Më pas ai tregon një fakt kurioz për karrierën e tij: “Kur luaja te Ajax, vetëm 14 vjeç, luaja gjithmonë në mesfushë para mbrojtjes, kisha si shembull Busquets, por dhe Pirlon. Kam parë shumë video të Pirlos dhe më pëlqente shumë si luante. Ka qenë një shembull fantastik”. /R.Lika-Koha Jone/