Dinamo kapitullon me Lushnjën, Tërbuni nuk ndalet as në Kavajë

Sporti E Diel, 18 Prill 2021 22:50

Nuk ka më “stacion” ku të ndalet Tërbuni i Pukës dhe as Lushnja e Bylis, që kryesojnë dy grupet e Kategorisë së Parë, ndërkohë që vetëm dy ekipe do të ngjiten në një kategori më lart. Në Grupin A, Tërbuni fitoi sot në Kavajë, në ndeshjen e javës së 21-të, 2-1 ndaj vendasve, duke mbajtur diferencën me katër pikë nga ndjekësit më të afërt. Mamurrasi dhe Besëlidhja fituan gjithashtu në transfertë, por presin prej javësh një hap fals të pukjanëve, që të përfitojnë dhe të arrijnë objektivin.

Në Grupin B, rivaliteti shihet edhe më i vështirë mes dy ekipeve kryesuese, Lushnjës e Bylis, që fituan në transfertë dhe mbajnë vendin e parë me të njëjtën kuotë pikësh. Lushnja fitoi ndaj Dinamos në kryeqytet dhe trajneri i rikthyer Faruk Sejdini pa sesi “u përmbys” rezultati dhe si kapitulloi për dy javë radhazi një nga emrat më të mëdhenj të futbollit shqiptar, në përballjet me dy ekipet rivale.