Donnarumma: Italia shkon në Kupën e Botës, Milani lufton për titull këtë sezon!

Portieri italian Gianluigi Donnarumma është shprehur plot besim për të ardhmen e kombëtares së Italisë dhe për garën për titull në Serie A. Në një intervistë për mediat italiane, gardiani i Manchester City-t theksoi se skuadra “Axurre” nuk do të lejojë që historia e mungesës në dy Botërorët e fundit të përsëritet.

“Nuk do të ndodhë për herë të tretë, nuk mund të ndodhë. Ky ekip do të jetë në Kupën e Botës, nuk kam asnjë dyshim. Kemi mësuar nga gabimet e së kaluarës dhe do të jemi gati për sfidat që vijnë,”  tha Donnarumma.

Portieri shtoi se atmosfera në grup është e shkëlqyer dhe askush nuk e nënvlerëson situatën: “Ky grup lojtarësh e do njëri-tjetrin, jemi të bashkuar dhe të motivuar. Fjala playoff nuk na tremb më, përkundrazi, na frymëzon.”

Edhe pse aktivizohet në Premier League, Donnarumma e ndjek me vëmendje futbollin italian. Ai e vlerëson garën për titull në Serie A si më të fortën e viteve të fundit.

“Në Itali ka katër ose pesë ekipe që mund të luftojnë për kreun. Më pëlqen Milani, më intrigon mënyra si po ecën. Kam folur me njerëz që e njohin mirë ambientin dhe të gjithë besojnë se kuqezinjtë mund ta fitojnë titullin.”