Ish-sulmuesi legjendar Thierry Henry ka reaguar ashpër ndaj vendimit për kartonin e kuq të dhënë për Pau Cubarsí, episod që ndikoi ndjeshëm në humbjen 2-0 të Barcelonës ndaj Atlético Madrid në çerekfinalet e UEFA Champions League.
Në analizën e tij, Henry e vuri në dyshim drejtësinë e vendimit, duke theksuar se rasti nuk përmbushte plotësisht kushtet për një përjashtim të drejtpërdrejtë.
“Jo, për mua nuk është karton i kuq”, u shpreh ai, duke sqaruar se megjithëse rregulli për ndalimin e një rasti të pastër për gol nga lojtari i fundit është i qartë, çdo situatë duhet vlerësuar në kontekstin konkret.
Sipas tij, në momentin e ndërhyrjes, lojtari i Atletico-s nuk kishte kontroll të plotë mbi topin, këndi i goditjes nuk ishte ideal dhe distanca nga porta mbetej e konsiderueshme.
“A jemi të sigurt që ai do të shënonte? Unë nuk jam i bindur”, theksoi Henry.
Analiza e ish-yllit francez nxjerr në pah rëndësinë e interpretimit të detajeve në vendime të tilla, duke sugjeruar se arbitrat duhet të marrin në konsideratë jo vetëm pozicionin në fushë, por edhe probabilitetin real të realizimit të golit.