Elseid Hysaj bëhet rekordmeni absolut i Kombëtares shqiptare!

Elseid Hysaj ka shkruar sot një faqe të artë në historinë e futbollit shqiptar. Mbrojtësi shkodran është bërë lojtari me më shumë paraqitje në historinë e Kombëtares, duke arritur shifrën rekord prej 94 ndeshjesh me fanellën kuqezi.

Ky moment historik u shënua gjatë miqësores ndaj Jordanisë, ku Hysaj u aktivizua në minutën e 77-të, duke u bërë zyrtarisht rekordmeni absolut i Shqipërisë, përpara çdo futbollisti tjetër që ka përfaqësuar ngjyrat kuqezi ndër vite.

31-vjeçari, që prej disa sezonesh mbron ngjyrat e Lacios në Serie A, është një simbol i përkushtimit, profesionalizmit dhe stabilitetit në shërbim të Kombëtares. Që nga debutimi i tij në vitin 2013, Hysaj është shndërruar në një shtyllë të mbrojtjes dhe një lider të qetë në fushë, duke qenë pjesë e momenteve më të ndritura të futbollit shqiptar, përfshirë Euro 2016 dhe Euro 2024.