Trajneri i Barcelonës, Hansi Flick, ka reaguar pas eliminimit nga UEFA Champions League, duke theksuar zhgënjimin për rezultatin, por edhe krenarinë për paraqitjen e skuadrës së tij ndaj Atlético Madrid.
Tekniku gjerman pranoi se momentet kyçe vendosën fatin e përballjes, duke nënvizuar se Barcelona kishte mundësi reale për të siguruar kualifikimin: “Jemi të zhgënjyer, sepse patëm shansin të mbyllnim ndeshjen me rezultatin 3-0. Krijuam shumë raste, por nuk i shfrytëzuam si duhet dhe në fund u ndëshkuam.”
Flick vlerësoi maksimalisht paraqitjen e ekipit të tij, edhe pse luajti me një lojtar më pak: “Skuadra zhvilloi një ndeshje fantastike. Pavarësisht vështirësive, treguam karakter dhe cilësi. Ndonjëherë duhet të pranosh edhe mungesën e fatit.”
Sipas tij, diferencën e bënë detajet e vogla: “Janë episodet ato që vendosin në këto nivele. Djemtë dhanë gjithçka në fushë, por nuk mjaftoi.”
Duke analizuar të dyja ndeshjet, trajneri gjerman u shpreh i bindur se skuadra e tij meritonte më shumë: “Nëse shohim dy përballjet në tërësi, ne meritonim të ishim në gjysmëfinale. Por ky është futbolli.”
Pas eliminimit nga Champions, fokusi i Barcelonës zhvendoset te kampionati: “Tani objektivi është La Liga. Jemi në rrugë të mirë dhe duhet të ruajmë këtë mentalitet. Jemi një skuadër e re dhe do të përmirësohemi sezonin e ardhshëm.”