Futbollisti i Veronës grushte me një tifoz pas humbjes ndaj Milanit (VIDEO)

Një episod i rëndë ka ndodhur pas ndeshjes Hellas Verona-Milan, e zhvilluar në javën e 33-të të Serie A, ku tensioni ka vazhduar edhe jashtë stadiumit Stadio Marcantonio Bentegodi.

Sipas pamjeve të publikuara nga Telenuovo dhe dëshmive të para, sulmuesi i Verona-s Gift Orban është përfshirë në një incident të rëndë me tifozët në momentin që po largohej nga stadiumi.

Pas humbjes ndaj Milanit, Orban është shfaqur i nervozuar dhe fillimisht ka refuzuar të ndalet për fotografi me tifozët. Situata ka eskaluar më tej kur automjeti i tij është goditur me dorë, çka ka bërë që lojtari të ndalojë makinën, të zbresë dhe të përfshihet në një përplasje fizike me një tifoz.

Ngjarja ka shkaktuar kaos të momentit, me disa tifozë të tjerë që janë përpjekur të ndërhyjnë për të qetësuar situatën. Pamjet e incidentit janë filmuar nga të pranishmit me celularë, ndërsa në vendngjarje ka mbërritur edhe policia italiane Digos për të nisur verifikimet dhe hetimet për rastin.

VIDEO