UEFA ka përcaktuar arbitrat që do të drejtojnë sfidën mes Shqipërisë dhe Finlandës, e vlefshme për UEFA Nations League, më 12 nëntor, në orën 20:45, në stadiumin “Air Albania”. Ndeshja do të gjykohet nga arbitri portugez João Pinheiro, i cili do të jetë përgjegjës për drejtimin e kësaj sfide të rëndësishme për kuqezinjtë.
Në krah të tij si asistentë do të jenë bashkëkombësit Luciano Maia dhe Hugo Marques, ndërsa rolin e arbitrit të katërt do ta ketë João Gonçalves. Edhe sistemi VAR do të jetë në duart e arbitrave portugezë. Tiago Martins është caktuar në rolin e arbitrit të videos, ndërsa Bruno Esteves do të jetë ndihmësi i tij në VAR.
Kështu, UEFA i ka besuar një trupe tërësisht portugeze drejtimin e një takimi me rëndësi për ecurinë e Shqipërisë në Nations League. Kuqezinjtë do të kërkojnë të shfrytëzojnë faktorin fushë dhe mbështetjen e tifozëve në “Air Albania”, me synimin për të marrë një rezultat pozitiv përballë Finlandës.
