Në gjysmëfinalet e UEFA Champions League, kanë arritur katër skuadra që ndoshta nuk janë absolutisht më të mirat në Europë, por pa dyshim janë katër nga gjashtë më të fortat. Ato përfaqësojnë një futboll me ritëm, shpejtësi, guxim dhe agresivitet. Të gjitha janë shumë të forta, por gjysmëfinalja mes Paris Saint-Germain dhe Bayern Munich i ngjan më shumë një finaleje sesa përballja mes Atlético Madrid dhe Arsenal.
Duke rikujtuar renditjen e fazës së grupeve, Arsenal ishte i pari, Bayern Munich i dyti, ndërsa Paris Saint-Germain i 11-ti dhe Atlético Madrid i 14-ti. Kanë kaluar vetëm tre muaj, por këto shifra mbeten domethënëse.
PSG- Bayern
Është përballja mes dy skuadrave më spektakolare dhe sulmuese. Gjermanët kanë pasur një sezon shumë të qëndrueshëm dhe në çerekfinale shënuan 6 gola ndaj Real Madrid. Dyshimi i vetëm lidhet me formën e portierit veteran Manuel Neuer. Nga ana tjetër, PSG i Luis Enrique është në formë maksimale, siç tregoi me dy fitore 2-0 ndaj Liverpool. Megjithatë, gjermanët kanë një avantazh minimal: Bayern 51%-PSG 49%
Diferenca është e vogël, por francezët duken pak më të brishtë në mbrojtje, sidomos pas largimit të Gianluigi Donnarumma.
Atletico-Arsenal
Pak kush besonte te Diego Simeone, por ai ka evoluar stilin e tij, duke u përshtatur me futbollin modern europian. Tani përballet me një Arsenal pothuajse perfekt, të drejtuar nga Mikel Arteta, me shumë talente dhe shumë efikas në goditjet standarde. Edhe pse “Topçinjtë” kanë shfaqur disa luhatje së fundmi, mbeten favoritë: Arsenal 55%-Atletico 45%
Sipas kësaj projeksioni, finalja më e mundshme është Bayern–Arsenal, një përballje e pa parë më parë në historinë e kompeticionit. Ndërsa finalistja që do të dalë nga dueli franko-gjerman pritet të jetë edhe favoritja kryesore për të ngritur trofeun.