Hamilton dhe Leclerc, betejë në pistë: Vasseur lejon garën e lirë te Ferrari

Lewis Hamilton shënoi podiumin e tij të parë me Ferrari-n në Kinë, një shenjë e një piloti të rigjetur, i cili tregoi agresivitet dhe frymë luftarakë që prej kohësh nuk ishin parë. Në Shangai, ai u përfshi në një duel të gjatë dhe intensiv me shokun e skuadrës, Charles Leclerc, për vendin e tretë. Kjo betejë, e karakterizuar nga parakalime të shumta, disa prej të cilave dukeshin më pak natyrale, u vlerësua nga drejtori i ekipit, Fred Vasseur. Ai theksoi se nuk kishte ndërmend të “ngrinte pozicionet” dhe se dëshironte t’i linte pilotët e tij të garonin lirshëm, duke shprehur besimin e tij tek ata dhe puna e tyre.

Hamilton kishte shprehur prej kohësh dëshirën për një makinë “për vete”, veçanërisht vitin e kaluar kur skeptikët e konsideronin të mbaruar me SF-25 që nuk e ndjente të tijën. Megjithatë, testet e reja dhe Ferrari “me ADN-në e tij” sollën podiumin e parë. Lewis festoi me qetësi, duke e ditur se vendi i tretë ishte vetëm fillimi i një rrugëtimi më të gjatë. Ai shprehu lumturinë për punën e madhe të ekipit, duke theksuar se megjithëse nuk ishin ende në pozicionin e dëshiruar, do të arrinin atje. Në Kinë, përpara tyre ishte Mercedes-i, këtë herë me Antonelli-n, të cilin Hamilton e përgëzoi me një përqafim të gjatë, duke i thënë: “Urime Kimi. Është një nder të ndash këtë moment me ty. Ke marrë vendin tim dhe ke fituar me një ekip të madh.”

Përpara kësaj, sfida me Leclerc në pistë ishte një betejë në limit, por korrekte mes dy pilotëve të Ferrari-t, e ndikuar nga menaxhimi i ndryshëm i gomave dhe baterive. Hamilton komentoi se ishte një “luftë e vështirë, ndoshta edhe u prekëm, por garat funksionojnë kështu, u argëtova”, duke lënë të kuptohej një dëshirë për revansh. Leclerc, nga ana e tij, u përgjigj: “Lewis është një pilot të cilit mund t’i besosh kur garon rrotë më rrotë. Ishte një betejë e bukur, edhe pse disa parakalime dukeshin pak artificiale.” Afërsia mes dy pilotëve të kuq është një sinjal i shkëlqyer për Maranello-n, duke treguar se mund të mbështetet te dy yje. Për ata që kërkonin një urdhër skuadre, drejtori i ekipit Vasseur u përgjigj: “Gjithçka ishte nën kontroll, preferoj t’i lë të garojnë kështu.”

Vëmendja, megjithatë, i kushtohet diferencës me Mercedes-in. Hamilton shpjegoi se “në këtë moment diferenca e fuqisë është e dukshme – ata kanë vërtet një motor shumë të mirë. Në kthesa jemi po aq të shpejtë sa ata, por kur na parakalojnë duket sikur fluturojnë.” Ky ishte një mesazh i qartë, të cilin anglezi e kishte theksuar tashmë gjatë garës kur, i galvanizuar nga një nisje super, kërkoi në radio: “Djem, më jepni më shumë fuqi.” Nga Maranello sigurojnë se po punojnë për këtë: “Në Miami do të mbërrijë një paketë e parë e rëndësishme përditësimesh, e dimë që duhet të përmirësojmë motorin.” Dhe atëherë Lewis jep alarmin: “Do të jemi në luftë, ju siguroj.”

Marrë nga La Gazzetta dello Sport