Harry Kane mezi pret përballjen me Real Madrid

Bayern Munich është kualifikuar në çerekfinalet e UEFA Champions League pas një dominimi të thellë ndaj Atalanta, duke e mposhtur me rezultat të përgjithshëm 10-2. Në ndeshjen e kthimit, bavarezët fituan 4-1, duke regjistruar një nga fitoret më të thella ndaj një skuadre italiane në fazat me eliminim direkt.

Tani, Bayern do të përballet me Real Madrid, rekordmenët e kompeticionit, në një nga përballjet më të forta të kësaj faze. Sulmuesi Harry Kane u shpreh i sigurt se skuadra e tij nuk i trembet askujt dhe mezi pret këto ndeshje të mëdha.

Kane ishte protagonist edhe në këtë sfidë, duke shënuar dy gola dhe duke arritur shifrën e 50 golave në Champions League. Ai renditet ndër lojtarët më të shpejtë që kanë arritur këtë kuotë, në të njëjtin ritëm me Lionel Messi, ndërsa vetëm Erling Haaland dhe Ruud van Nistelrooy e kanë bërë në më pak ndeshje.

Gjithashtu, Kane ka shënuar 29 gola në 34 ndeshje me Bayern në Champions League që nga sezoni 2023-24, duke qenë lojtari më produktiv në këtë periudhë.