Inter bën gati festën e titullit, lojtarët zikaltër do të marrin një bonus të majmë

Interi është shumë pranë shpalljes kampione e Serie A për sezonin aktual. Ndeshja ndaj Parmës mund të rezultojë vendimtare për zikaltërit, pasi një fitore do ta bënte matematikisht të sigurt titullin e 21-të në histori.

Ndërsa pritet vetëm konfirmimi zyrtar në fushë dhe festa e shumëpritur, prapaskena financiare është tashmë e qartë. Sipas La Gazzetta dello Sport, fondi amerikan Oaktree Capital Management ka vendosur tashmë bonuset për skuadrën në rast triumfi.

Shuma totale që do të ndahet mes lojtarëve dhe stafit teknik arrin në 6 milionë euro, një shpërblim i konsiderueshëm për arritjen e objektivit madhor sezonal. Ky stimul financiar vjen si vlerësim për performancën e ekipit gjatë gjithë kampionatit dhe si motivim shtesë për të mbyllur me sukses garën për titull.

Tashmë gjithçka mbetet në dorën e skuadrës në fushë, ku përballja me Parmën mund të vulosë zyrtarisht një tjetër sezon të suksesshëm për Interin.