Inter mposht Parmën dhe ngjitet i vetëm në krye të Serie A

Interi ka marrë një fitore të pastër 3-0 ndaj Parmës në javën e gjashtë të Serie A, duke u ngjitur përkohësisht i vetëm në krye të renditjes së kampionatit italian.

Skuadra zikaltër e zgjidhi praktikisht ndeshjen që në pjesën e parë, duke shënuar të tre golat brenda 31 minutave të para. Goli i avantazhit erdhi në minutën e 13-të, kur Petar Sucic dërgoi topin në rrjetë, duke i dhënë Interit kontrollin e takimit.

Pak minuta më vonë, Pio Esposito fitoi një penallti, e cila u konfirmua edhe nga sistemi VAR. Nga pika e bardhë u tregua i saktë Hakan Calhanoglu, i rikthyer në fushë pas problemeve fizike, duke dyfishuar shifrat për skuadrën e tij.

Në minutën e 31-të, Marcus Thuram shënoi golin e tretë, duke e bërë edhe më të vështirë misionin e Parmës për të reaguar.

Në pjesën e dytë, Interi administroi avantazhin dhe kontrolloi lojën deri në përfundim, pavarësisht se një tjetër gol i Pio Espositos u anulua.

Me këtë sukses, Interi siguron tri pikë të rëndësishme dhe merr përkohësisht kreun e Serie A. Tashmë, skuadra zikaltër do të ndjekë me interes përballjen mes Comos dhe Romës, rezultat i cili mund të ndikojë në pozicionin e saj në klasifikim.