Inter hedh një hap të madh drejt titullit kampion në Serie A, pasi mposhti 3-0 Cagliarin në javën e 33-të të kampionatit. Në stadiumin San Siro, zikaltërit e patën të vështirë në pjesën e parë, përballë një kundërshtari të organizuar mirë në mbrojtje. Megjithatë, gjithçka ndryshoi në pjesën e dytë.
Në minutën e 52-të, Marcus Thuram zhbllokoi rezultatin nga afër pas një asistimi të Federico Dimarco. Vetëm katër minuta më vonë, pas një aksioni të ndërtuar nga Francesco Pio Esposito, ishte Nicolò Barella që dyfishoi shifrat, duke i dhënë qetësi skuadrës së tij.
Në kohën shtesë, Piotr Zieliński vulosi fitoren me golin e tretë në minutën e 92-të, duke fiksuar rezultatin përfundimtar 3-0. Me këtë sukses, trajneri Cristian Chivu e çon Interin përkohësisht në +12 pikë nga Napoli, që ende duhet të luajë ndaj Lazio.
Titulli kampion duket gjithnjë e më pranë për zikaltërit, të cilëve tashmë u duhen edhe 7 pikë për ta siguruar matematikisht.