Interi revolucion në mbrojtje, sakrifikohet edhe Bastoni

Inter është shumë pranë sigurimit të titullit në Serie A, por drejtuesit zikaltër kanë nisur paralelisht përgatitjet për një verë të nxehtë në merkato, ku pritet një revolucion i thellë në skuadër. Hapi i parë i klubit është rinovimi i kontratës me trajnerin Cristian Chivu, një sinjal i qartë për të forcuar projektin teknik dhe për t’i dhënë më shumë stabilitet pankinës.

Në të njëjtën kohë, drejtuesit kanë hapur bisedimet me Barcelona për transferimin e Alessandro Bastoni. Mbrojtësi i kombëtares italiane shihet si lojtari kryesor që mund të sakrifikohet për të gjeneruar të ardhura të konsiderueshme, të cilat do të përdoren për rindërtimin e repartit defensiv. Vendimi i tij për t’u larguar lidhet edhe me presionin e madh që ka përjetuar kohët e fundit në stadiume të ndryshme.

Nga ana tjetër, disa largime duken të pashmangshme. Francesco Acerbi, Stefan de Vrij dhe Matteo Darmian pritet të largohen me parametra zero, pasi kontratat e tyre po shkojnë drejt fundit. Ndërkohë, edhe Carlos Augusto mund të largohet në rast të një oferte të kënaqshme.

Situata mbetet e hapur edhe për Denzel Dumfries, për të cilin ka interes konkret nga klubet e Premier League, por edhe nga Bayern Munich. Me shumë ndryshime në horizont, Inter synon të ndërtojë një skuadër të re konkurruese për sezonin e ardhshëm.