Juventus s’di të fitojë më, ndalet në derbin ndaj Torinos (VIDEO)

Juventus nuk ka mundur që të shkojë më shumë se një barazim 2-2 në derbin ndaj Torinos, duke bërë një tjetër hap fals në kampion. Bardhezinjtë në fakt e nisën mjaft mirë ndeshjen duke kaluar në avantazh që në minutën e 13-të me Chiesa-n, që shënoi pas një aksioni të gjatë. Torino kundërpërgjigjet mjaft mirë duke vendosur baraspeshën në minutën e 27-të me Sanabria.

Sulmuesi i Torinos u bë protagonist në fillimin e pjesës së dytë, duke realizuar vetëm pas 13 sekondash lojë, duke përfituar nga një gabim i Kulusevskit në kthimin e topit pas.

Në minutën e 79-të, Ronaldo vendosi baraspeshën me një goditje me kokë dhe që do të ringjallte shpresat për një fitore, e cila ë fakt nuk do t vinte. Bentancur u ndal nga një pritje fantastike e Sirigut dhe më pas nga shtylla. Juventus për momentin mban vendin e katërt me 56 pikë, po aq sa Napoli, me të cilën do të rikuperojë sfidën e fazës së parë në mesjavë. /R.Lika-Koha Jone/