Kategoria e Parë, Tërbuni dhe Lushnja “komandojnë”, rriten shpresat e Dinamos

Sporti E Shtunë, 17 Prill 2021 08:28

Tërbuni i Pukës “fluturon” në krye të klasifikimit, në Grupin A të Kategorisë së Parë, falë fitores 2-1 që shënoi pasditen e sotme ndaj Besës. Kavajasit barazuan shifrat në pjesën e parë, por Djarmani shënoi golin e fitores nga fundi i ndeshjes, me vlerën e tre pikëve, duke mbajtur pukjanët të sigurtë në krye të rënditjes. Mamurrasi ka mposhtur pastër Kastriotin 2-0, falë një dopiete të shënuar nga Fonseka dhe ndodhet në vend të dytë. Besëlidhja është mundur në Bureel, 2-1, duke mbetur në vend të tretë, 4 pikë pas kryesuesve.

Lushnja merr kreun e Grupit B, falë disfatës së Sopotit në Sarandë. Dinamo nga ana tjetër afrohet me një pikë larg kreut, dhe mban ritmin drejt Kategorisë Superiore. Janë disa skuadra pretendente, që e kanë bërë garën më interesante në grupin e zonës së Jugut, në Kategorinë e Parë. Butrinti luajti “poker” ndaj kryesuesve në Grupin B. Golat e Muços, Dhramit, dopietë e Raboshtës, e Bazajt ndihmuan vendasit të seleksionin një fitore të madhe. Ndërkohë, miqtë e mbyllën takimin me 9 lojtarë. Dinamo fitoi minimalisht në Tiranë ndaj Luftëtarit dhe u ngjit në vend të dytë, në ndjekje të Lushnjës, falë golit të Imamit. Lushnja fitoi por me vështirësi dhe ndihmën e dy 11-metërshave të kontestuar, duke përmbysur shifrat ndaj Bylis 3-2, dhe u kthye në përfundim të javës së 10-të në krye të rënditjes së Grupit B.