Mbyllen pjesët e para në Abissnet Superiore, ja rezultatet deri më tani

Sot po zhvillohet java e fundit e sezonit të rregullt në Abissnet Superiore, një raund vendimtar që do të përcaktojë fatin e disa skuadrave. Përveç Egnatias, Vllaznisë dhe Dinamos që kanë siguruar vendin në “Final Four”, sot do të mësohet edhe ekipi i katërt që bashkohet me ta, si dhe skuadrat që do të bien nga kategoria apo do të luajnë në play-out.

Në “Niko Dovana”, pjesa e parë mes Teutës dhe Egnatias përfundoi në barazim 1-1. Teuta kaloi në avantazh në minutën e 9-të me golin e Dejvid Kapllanit nga penalltia, ndërsa Jahaja barazoi për rrogozhinasit në minutën e 22-të.

Në Korçë, Skënderbeu dhe Bylisi kanë dhuruar emocione që në fillim. Ballshiotët zhbllokuan rezultatin në minutën e 10-të me një gol me kokë nga Mustafa, por vetëm katër minuta më pas Bismark barazoi për vendasit.

Në “Loro Boriçi”, Laçi kaloi në avantazh ndaj Vllaznisë me golin e Bibos në minutën e 16-të, ndërsa Bekim Balaj u përgjigj për shkodranët në minutën e 23-të duke barazuar rezultatin.

Në Rrogozhinë, në derbin e kryeqytetit mes Dinamos dhe Tiranës, bardheblutë kaluan në epërsi me një gol të Rafael në minutën e 29-të, pas një goditjeje me kokë.

Ndërkohë në “Arenën e Demave”, Partizani mbylli pjesën e parë në avantazh 1-0 ndaj Elbasanit, me gol të shënuar në minutat e fundit të fraksionit të parë.