Javën e ardhshme, Milan dhe Juventusi do të përballen jo vetëm në fushën e lojës, por edhe në merkato, në një garë të mundshme për Robert Lewandowskin. Sulmuesi polak, i cili ka kontratë me Barcelonën që skadon pas rreth dy muajsh, ndodhet përpara një vendimi të rëndësishëm për të ardhmen e tij: të pranojë rinovimin me katalanasit me ulje page ose të nisë një aventurë të re në fund të karrierës së tij.
Në moshën 37-vjeçare, Lewandowski nuk ka ndërmend të tërhiqet nga futbolli, ndërsa ende po shqyrton opsionet e tij. Për këtë arsye, agjenti i tij, Pini Zahavi, pritet të udhëtojë në Itali gjatë fundjavës së ardhshme, ku do të zhvillojë takime me drejtuesit e Milanit dhe Juventusit për të vlerësuar interesin dhe kushtet që klubet mund të ofrojnë për sulmuesin polak.
Përveç klubeve italiane, për Lewandowskin ka interes edhe nga Arabia Saudite dhe Major League Soccer në SHBA. Edhe pse në prag të 38-vjetorit, ai vazhdon të mbetet një nga sulmuesit më produktivë, me një karrierë që numëron mbi 560 gola me Dortmundin, Bayern Munich dhe Barcelonën. Në sezonin aktual, ai ka shënuar edhe 17 gola me ekipin katalanas.
Vetë futbollisti ka deklaruar se nuk ka marrë ende një vendim përfundimtar, duke theksuar se është i hapur dhe se Barcelona është në dijeni të mendimeve të tij. Ndërkohë, Milan dhe Juventus po përgatiten të zbulojnë qëndrimet dhe ofertat e tyre, në një garë që pritet të jetë e fortë jo vetëm në fushë, por edhe në merkato.