Milani shfaq interes për Asension, Tare nis kontaktet me Jorge Mendes

Marco Asensio mund të jetë gati për një transferim në Serie A. Sulmuesi spanjoll, i përfaqësuar nga menaxheri Jorge Mendes, i është propozuar Milanit, që është në kërkim të përforcimeve në repartin ofensiv.

Sipas raportimeve nga Franca, ku ndodhet ende nën kontratë me Paris Saint-Germain deri në vitin 2026, Asensio nuk bën më pjesë në planet e trajnerit Luis Enrique dhe kërkon të luajë më rregullisht, në funksion të Kupës së Botës 2026.

Interesimi më konkret ka ardhur nga Fenerbahçe, ku së fundmi është zhvilluar një bisedë direkte mes Asensios dhe trajnerit José Mourinho. Megjithatë, ish-lojtari i Real Madridit nuk është shumë i bindur për një kalim në kampionatin turk. Një tjetër pistë është Villarreal, por aktualisht nuk ka mundësitë financiare për të konkurruar me klubet e tjera të mëdha.

Milan ka nisur kontaktet e para me PSG-në dhe mund të shndërrohet në një alternativë reale për spanjollin, që dëshiron të qëndrojë në një kampionat elitë si Serie A. Klubi francez do të ishte i gatshëm ta lëshojë për një shifër rreth 15 milionë euro.

Pengesa kryesore për “kuqezinjtë” mbetet paga e lartë e Asensios, që aktualisht përfiton 8 milionë euro neto në sezon, një shifër jashtë politikës së zakonshme të pagave në Milan.