Ndeshja e parë si titullar pas 6 muajsh, Robben përlotet pasi jep dy asistë

Arjen Robben është rikthyer në mënyrën më të mirë të mundshme. Në moshën 37-vjeçare, holandezi luajti për herë të parë si titullar me Groningenin pas 6 muajsh dhe ofroi versionin e tij më të mirë.

Dy pasime për gol nga ish-lojtari i Bayern Munchen, të dyja me të majtën e tij magjike. Por, jo vetëm kaq. Në intervistën pas ndeshjes, Robben tha se ishte i gatshëm edhe për kthimin te kombëtarja e Holandës, nëse trajneri De Boer do ta shikojë të arsyeshme.

Kur tha këto fjalë, mesfushori u përlot: “Nëse De Boer më thërret për Evropianin, do të pranoja. Do të ishte shumë bukur, por duhet të jemi realist. Duhet të jem mirë fizikisht dhe në formë. Nuk e fsheh që e ëndërroj Evropianin, por nuk duhet të “fluturoj”. Nëse më thërret dhe nëse janë kushtet që unë të luaj një rol në përfaqësuese, do të pranoja”.

Arjen Robben e ka luajtur në tetor të vitit 2017 ndeshjen e tij të fundit me Holandën. Me “Tulipanët”, ai ka luajtur 96 ndeshje, duke shënuar 37 gola.