Një tjetër lojtar shqiptar mund të bashkohet me Mavrajn te Hamburg

Sulmuesi Admir Mehmedi është shumë pranë transferimit te skuadra e Hamburgut. Futbollisti i cili përfaqëson Zvicrën, gjatë sezonit të fundit është aktivizuar rrallëherë te Bajer Leverkusen dhe parashikohet largimi i tij në verë.

Mediat zvicerane bëjnë të ditur se Mehmedi është në bisedime me klubin e Hamburgut dhe shumë shpejt pritet të nisin negociatat edhe mes klubeve për transferimin e tij, meqë sulmuesi ka një kontratë deri në vitin 2019 me Bajer Leverkusen.

Te Hamburgu, Mehmedi do të gjejë Mërgim Mavrajn, i cili është pjesë fikse e formacionit të kësaj skuadre dhe ku brenda pak muajsh ka arritur të renditet mes liderëve në ekip.