Perez tërbohet pas eliminimit në Champions: Skuadra nuk është në lartësinë e Realit!

Eliminimi i Real Madrid në çerekfinalet e Champions League ka shkaktuar reagime të forta brenda klubit, me presidentin Florentino Pérez që ka mbajtur një fjalim të ashpër ndaj lojtarëve pas humbjes ndaj Bayern.

Sipas raportimeve nga Spanja, kreu i “Los Blancos” nuk e ka fshehur zhgënjimin për një sezon që e cilëson si dështim: “Vlerësoj përpjekjet tuaja, por kjo ka qenë një sezon zhgënjyes për të gjithë”, mësohet të ketë deklaruar ai para skuadrës, duke paralajmëruar një revolucion të mundshëm në merkaton e verës.

Eliminimi i këtij sezoni vjen pas një tjetër dështimi në çerekfinale, pasi një vit më parë madrilenët u ndalën nga Arsenal. Hera e fundit që Reali luajti një finale ishte në vitin 2024, kur triumfoi ndaj Borussia Dortmund duke fituar trofeun e 15-të në histori. Për një klub me një traditë të tillë, kjo konsiderohet e papranueshme.

Në fjalimin e tij, Perez ka qenë edhe më i drejtpërdrejtë: “E dini sa e vështirë është të jesh lojtar i Real Madridit. Një sezon pa trofe është dështim, por dy të tillë janë të papranueshëm. Të veshësh këtë fanellë është privilegj, por edhe përgjegjësi.”

Ai ka theksuar se shumë prej lojtarëve nuk kanë qenë në nivelin e pritshmërive dhe ka kërkuar një reagim në ndeshjet e mbetura: “Të paktën mbylleni sezonin me dinjitet.”

Aktualisht, Real Madrid ndodhet edhe në vështirësi në kampionat, duke qenë disa pikë pas Barcelonës, që e bën edhe më delikate situatën në “Santiago Bernabéu”.