Po bën xhiron e botës/ “Tërbohet” Di Canio, i bie me kokë tavolinës (VIDEO)

Një moment i pazakontë dhe tronditës ka ndodhur gjatë analizës së ndeshjeve çerekfinale të UEFA Champions League në televizionin italian Sky Sport, ku ish-sulmuesi i njohur Paolo Di Canio është bërë protagonist i një veprimi ekstrem.

Gjatë një debati të ndezur në studio me moderatoren Federica Masolin, 57-vjeçari humbi qetësinë dhe, në mënyrë të papritur, përplasi kokën mbi tavolinë plot tre herë radhazi. Sipas pamjeve që qarkulluan më pas në rrjetet sociale, goditjet duket se i shkaktuan edhe gjakderdhje në ballë.

Ngjarja la të habitur jo vetëm ekipin e produksionit, por edhe miliona teleshikues. Në studio ndodhej edhe ish-trajneri i Anglisë dhe i Real Madrid, Fabio Capello, i cili reagoi menjëherë duke i dhënë një facoletë kolegut të tij për të ndalur gjakun.

Moderatorja Masolin reagoi me habi dhe të qeshura nervoze, ndërsa Di Canio, pasi u ul sërish, u përpoq të minimizonte situatën duke vendosur një facoletë mbi plagë.

Pamjet e incidentit u bënë menjëherë virale në internet, duke rikthyer në vëmendje temperamentin e zjarrtë që ka karakterizuar gjithmonë figurën e Di Canio-s, si në fushën e lojës ashtu edhe jashtë saj.