Po shkëlqen me Sarrin, Juventus përgatit rinovimin me Dybala-n

Në fillim të sezonit, Paulo Dybala ishte shumë pranë largimit nga Juventusi, teksa ishte arritur akordi për një shkëmbim me Lukakun. Gjithsesi argjentinasi e refuzoi shkëmbimin duke vendosur që të qëndrojë dhe të luftojë për një vend në formacion.

Me kalimin e kohës ai i ka bindur të gjithë duke ka rilindur me Sarrin në pankinë, duke u shndërruar në një nga futbollistët me rendimentin më të lartë me fanellën bardhezi, ndaj tani drejtuesit e klubit do të ulen sërish me menaxherin e “La Yoyas”, por këtë herë për të folur për rinovimin.

Kontrata e Dybalës me Juven përfundon në verën e 2022, ndërsa Paratici e Nedved janë gati t’i ofrojnë një zgjatje të bashkëpunimit deri në verën e 2025-ës, gjithmonë nëse do të arrijnë edhe akordin ekonomik, pasi argjentinasi pretendon një pagë prej 10 milionë eurosh.

Sipas mediave pranë klubit torinez, në ditët në vijim është planifikuar një takim i parë mes Paraticit dhe menaxherit të Dybalës, ku synohet që të sistemohen edhe detajet e fundit për zgjatjen e kontratës.