Rebelimet e lojtarëve për të prishur kontratat, Hoeness: Te Bayern vendosim ne

Interi shpreson prej javësh të marrë Arturo Vidal nga Bayern, duke arritur, sipas zërave, edhe marrëveshjen me lojtarin. Por Bayern nuk ka ndërmend ta shesë kilianin, të cilin e ka nën kontratë, dhe e ka bërë të ditur se nuk do të pranojë asnjë ofertë.

Klubet dorëzohen shpesh para dëshirës së lojtarëve për t’u shitur, çka është vënë re edhe këtë verë, me futbollistë që rebelohen kundër punëdhënësve për t’ia arritur qëllimit. Bayern është një klub që bën përjashtim, duke mos iu nënshtruar kurrë trilleve të futbollistëve.

“Besoj se sot u jepet shumë rëndësi individëve. Ne te Bayern veprojmë ndryshe: Nëse Bayern thotë se një lojtar i tij nuk është në shitje, kjo do të thotë se djaloshi nuk lëviz nga Munihu”, thotë presidenti Uli Hoeness.

Një sinjal i qartë për Interin, siç ka ndodhur edhe herë të tjera, me kërkesat për lojtarë të ndryshëm.