Pas dy humbjeve radhazi, Shqipëria kërkon rikthimin te fitorja në duelin e radhës në Nations League që do e vendosë përballë Gjeorgjisë. Kuqezinjtë tanë nuk janë në një moment aspak të mirë për shkak të mungesave, por dhe të gjendjes psikologjike jo shumë optimiste me 3 pikë në 3 ndeshje.
Shqipëria renditet në vendin e tretë, por me një fitore në Tbilisi mund të rikthejë edhe njëherë shpresat për t’u kualifikuar në raundin tjetër.
Skuadra zhvilloi seancën e fundit stërvitore, që zgjati pak më shumë se 1 orë. Në minutat e para u fokusua te përgatitja atletike, ndërsa më pas stërvitja te loja me top dhe provimi i situatave apo skemave të ndryshme të lojës, duke provuar edhe goditjet në portë. Ndeshja Gjeorgji-Shqipëri e vlefshme për UEFA Nations League luhet në orën 18:00.
Formacioni – Trajneri Sylvinho pritet të bëj ndryshime në formacionin që do të hedh në fushën e lojës. Skema mbetet sërish e njëjtë, me brazilianin që qëndron fanatik ndaj 4-2-3-1. Arbër Hoxha pritet të rikthehet nga minuta e parë, për të ulur në stol Qazim Laçin.
Shqipëria (4-3-3) – Strakosha, Hysaj, Ismajli, Kumbulla,Mitaj, Ramadani, Asllani, Bajrami, Hoxha, Asani, Daku.
Bilanci i përballjeve – Në 16 përballje kemi fituar vetëm 3 herë, ndërsa 9 fitore kanë shkuar për Gjeorgjinë dhe 4 takime kanë përfunduar në barazim. Në portën kuqezi janë realizuar 24 gola, kundrejt 13 të Shqipërisë.