Trajneri i Atlético Madrid, Diego Simeone, ka komentuar me tone të forta performancën e talentit të Barcelonës, Lamine Yamal, pas kualifikimit të skuadrës së tij në gjysmëfinalet e UEFA Champions League.
Tekniku argjentinas, duke analizuar paraqitjen e të riut spanjoll, u shpreh se media po e ekzagjeron ndikimin e tij në futbollin europian: “Është një djalë i mirë dhe me shumë talent. Kërkoi duele një kundër një, shënoi herët në ndeshje dhe menjëherë mediat duan ta shpallin mbret të Europës”.
Simeone theksoi se në futboll rëndësi ka vetëm rezultati final dhe kualifikimi: “E vetmja gjë që ka rëndësi është kush kualifikohet. Duket sikur shtypi do që unë të kem frikë nga një adoleshent vetëm sepse bën lëvizje spektakolare dhe jep intervista me vetëbesim”.
Në vijim, ai solli edhe një krahasim të fortë me përvojat e tij në të kaluarën: “Për vite me radhë më është dashur të qëndroj në vijën anësore dhe të shoh Cristiano Ronaldo të shënojë tre-golësha dhe të eliminojë skuadrën time nga ky kompeticion. Kjo është frikë e vërtetë”.
Në përfundim, trajneri i Atlético-s theksoi diferencën mes talentit dhe ndikimit real në rezultate: “Lamine bëri një ndeshje shumë të mirë, por realiteti është që ne shkojmë në gjysmëfinale, ndërsa ai do ta ndjekë kompeticionin nga shtëpia. Ka një ndryshim të madh mes një paraqitjeje të bukur dhe të qenit një makth për kundërshtarët”.