Trajneri i Kombëtares Shqiptare, Sylvinho, ka bërë publike listën me 25 lojtarë të grumbulluar për dy sfidat e muajit shtator: miqësoren kundër Gjibraltarit dhe ndeshjen vendimtare ndaj Letonisë, e vlefshme për kualifikueset e Botërorit 2026.
Tekniku brazilian ka zgjedhur të mos sjellë emra të rinj këtë herë, duke i besuar grupit aktual të lojtarëve që kanë qenë pjesë e skuadrës edhe në ndeshjet e fundit.
“Kemi bërë rreth 50% të rrugëtimit dhe kemi edhe katër ndeshje për të luajtur. Jemi duke luftuar kundër kohës dhe duhet të përgatitemi mirë, sidomos për sfidën me Letoninë në shtëpi. Për lojtarët që mungojnë, si Ismajli, kam folur personalisht. Ka një dëmtim të lehtë dhe preferuam të mos rrezikojmë,” tha Sylvinho në konferencën për shtyp.
Trajneri u shpreh se nuk është momenti për eksperimente, por miqësorja ndaj Gjibraltarit do të shërbejë për të testuar disa elementë.
“Nuk është koha për ndryshime të mëdha. Kur një lojtar nuk ka më çfarë të japë, atëherë bëhen ndryshime, por aktualisht të gjithë lojtarët janë të motivuar. Gjibraltari do të na japë mundësinë të provojmë disa lojtarë si Bajrami, Berisha dhe Pajaziti, që ende nuk kanë luajtur 45 minuta me Kombëtaren. Ndeshja me Letoninë është e fortë, e dimë që është një sfidë vendimtare dhe kërkon përgatitje maksimale.”
Në lidhje me situatën e lojtarëve si Nedim Bajrami dhe Ernest Muçi, Sylvinho konfirmoi mbështetjen e plotë për dy mesfushorët.
“Bajrami nuk po kalon momentin e tij më të mirë, ndërsa Muçi ka pasur një dëmtim të lehtë, por tashmë është rikuperuar dhe ka luajtur 45 minuta me klubin. Të dy janë shumë të rëndësishëm për Kombëtaren dhe gjithmonë japin maksimumin në fushë.”
Braziliani pranoi se ka pasur dilema gjatë përgatitjes së listës, por theksoi se eksperienca është vendimtare në ndeshje të tilla.
“Puna për listën nis herët, që në fillim të gushtit. Këto janë ndeshje ku duhen lojtarë që kanë eksperiencë dhe janë mësuar me stilin tonë të lojës. Sigurisht, momenti i lojtarëve të rinj do të vijë, por jo tani.”
Sylvinho përmendi edhe disa futbollistë të Superiores që po ndiqen nga stafi teknik, si Qefalija dhe Dajsinani, duke lënë të hapur mundësinë që ata të jenë pjesë e Kombëtares në të ardhmen.
“Qefalija është një lojtar teknik dhe inteligjent, por për shkak të një dëmtimi dhe pas një diskutimi me klubin, nuk u grumbullua. Po ashtu, po vlerësojmë edhe lojtarë nga Egnatia, Tirana, Dinamo dhe Partizani. Dajsinani është një portier me personalitet dhe shpejtësi, dhe këto janë elemente që i vlerësojmë.”