Tebas ngre alarmin për ngarkesën e futbollistëve: Po shkojmë drejt pikës së thyerjes!

Presidenti i La Liga-s, Javier Tebas, ka ngritur shqetësimin për kalendarin gjithnjë e më të ngjeshur të futbollit dhe rrezikun në rritje të dëmtimeve te futbollistët.

Duke folur në Londër, gjatë një samiti mbi performancën dhe shëndetin e organizuar nga sindikata botërore e futbollistëve, FIFPRO, Tebas kërkoi ndërhyrje të vendosur nga FIFA dhe UEFA për të adresuar ngarkesën e lojtarëve.

Sipas tij, zgjerimi i Kupës së Botës për Klube dhe zhvillimi i Botërorit me 48 skuadra kanë shtuar ndjeshëm numrin e ndeshjeve në një kalendar që tashmë konsiderohet i tejmbushur.

“Disa lojtarë ende arrijnë ta përballojnë, pak a shumë, por në fund arrihet në një pikë thyerjeje të pashmangshme. Nëse nuk ndryshojmë drejtimin, situata do të përkeqësohet në mënyrë drastike, sepse është e paqëndrueshme. Në vend që të ulim ngarkesën mbi lojtarët, po e rrisim atë. Nëse nuk e trajtojmë këtë problem, futbolli do të vuajë”, deklaroi Tebas.

Presidenti i La Liga-s theksoi gjithashtu se organet drejtuese të futbollit duhet të kalojnë përtej konsultimeve formale me palët e interesuara dhe të ndërmarrin masa konkrete.

Në të njëjtën linjë u shpreh edhe Maheta Molango, drejtues i shoqatës që përfaqëson futbollistët e kampionateve angleze. Ai përmendi mungesat e Cole Palmer, Marcus Rashford, Declan Rice dhe dy lojtarëve të tjerë të Anglisë në këtë grumbullim ndërkombëtar.

“Kjo të bën të pyesësh se çfarë nuk shkon me këtë sistem. Nuk është një problem vetëm i Anglisë. Mjafton të shohësh rastet e Kai Havertz, Brian Brobbey apo Kylian Mbappé. Duhet të pyesim veten nëse ky është vërtet futbolli që duam”, u shpreh Molango.