Titulli i Superiores vendoset në 180 minutat e fundit, Partizani i merr kreun Teutës (VIDEO)

Titulli kampion në Kategorinë Superiore do të vendoset në 180 minutat e fundit të këtij sezoni. Partizani ka arritur një fitore minimale 1-0 në “Niko Dovana”, duke marrë kryesimin e kampionatit, me avantazhin e dueleve direkte.  Ndeshja nisi me polemika, teksa gjyqtari akordoi penallti në minutën e 6-të për Teutën, por më pas e anuloi. Në minutën e 24-t, pas një dalje të gabuar të portierit, Frashëri, Çinari është në vendin dhe në kohën e duhur për ta dërguar topin në kuadrat.

Pjesa e dytë ndërkohë ishte shumë e ndezur me raste të shumta për shënim në të dyja portat. Murataj provon me një goditje nga distanca, që do të stampohej në shtyllën e portës së durrsakëve, ndërkohë që portieri e shoqëroi topin vetëm me sy. Teuta në krahun tjetër provoi të rrezikonte, por e pati të vështirë për të çarë mbrojtjen e “Të Kuqve”.

Bardhi dhuroi spektakël në minutën e 74-të me një veprim shumë të bukur akrobatik, ndërkohë që pak minuta më pas Asani shpërdoroi një rast të artë thuajse me portën e boshatisur.

Laçi dhe Vllaznia mbajnë gjallë shpresat deri në fund duke marrë fitore minimale. Kurbinasit fituan ndaj Tiranës me një gol të Mazrekaj, ndërkohë që Vllaznia mundi Kastriotin falë një goli të Dilaver. Kukësi mundi 2-1 me përmbysje Bylisin, ndërkohë që Skënderbeu fitoi pastër 2-0 kundër Apolonisë. /R.Lika-Koha Jone/