Transferimi i Kante te Fenerbahce, klubi turk falënderon publikisht presidentin Erdogan

Në futbollin modern, historitë shpesh shkojnë përtej fushës së blertë. Në Turqi, transferimi i N’Golo Kanté te Fenerbahçe është shoqëruar me një falënderim publik që ka hapur debat mbi ndikimin e institucioneve shtetërore në operacionet e mëdha të merkatos.

Klubi i Stambollit i ka atribuar një pjesë të suksesit të kësaj marrëveshjeje mbështetjes së presidentit turk, Recep Tayyip Erdogan. Falënderimi u bë publik nga presidenti i Fenerbahçes, Sadettin Saran, i cili theksoi rolin e rëndësishëm të ndërhyrjes politike në finalizimin e transferimit të mesfushorit francez.

“Klubi ynë ka përfunduar me sukses transferimin e N’Golo Kanté, një prej figurave më të spikatura të futbollit botëror. Në emrin tim dhe të klubit, dëshiroj të falënderoj presidentin tonë, Recep Tayyip Erdogan, për mbështetjen e tij të konsiderueshme, e cila e bëri të mundur këtë proces dhe do të kontribuojë në zhvillimin e Fenerbahçes dhe të futbollit turk”, shkruhet në mesazhin e Saranit.

Në deklaratë nuk mungon as falënderimi për tifozët, duke vlerësuar besimin dhe mbështetjen e tyre të vazhdueshme gjatë gjithë procesit.