Tronditet bota e futbollit, vritet presidenti i klubit bullgar Botev Plovdiv

Biznesmeni bullgar Iliyan Filipov, pronar i kompanisë së transportit dhe ndërtimit PIMK dhe president i klubit Botev Plovdiv, është vrarë me armë zjarri në qytetin e Plovdivit.

Sipas informacionit të bërë publik nga Prokuroria Publike, ngjarja ka ndodhur rreth orës 01:00 të mëngjesit. Filipov është qëlluar në kokë në pronën e tij, ndërsa autoritetet kanë nisur menjëherë hetimet për zbardhjen e rrethanave dhe identifikimin e autorit ose autorëve.

Prokuroria ka bërë të ditur se deri në këto momente nuk ka të dhëna që biznesmeni të ketë marrë kërcënime para ngjarjes.

Pas krimit, forcat e policisë dhe ekspertët kriminalistikë rrethuan një zonë të gjerë pranë vendit të ngjarjes. Rrugët përreth u bllokuan përkohësisht, ndërsa grupet hetimore kryen këqyrjen e vendit dhe grumbulluan provat materiale që mund të ndihmojnë në zbardhjen e vrasjes.

Filipov ishte themelues dhe një prej figurave kryesore të PIMK, kompani e konsideruar ndër grupet e rëndësishme në sektorin e transportit në Bullgari, me aktivitet edhe në fushën e ndërtimit.

Emri i tij ishte i lidhur ngushtë edhe me Botev Plovdiv. Filipov mori drejtimin e klubit në verën e vitit 2025, në një periudhë të vështirë financiare, dhe u angazhua në procesin e stabilizimit të situatës së klubit.

PIMK ishte gjithashtu kompania që u përfshi në projektin e rinovimit të stadiumit “Hristo Botev”. Në muajt e fundit, Filipov dhe kompania e tij kishin pasur përplasje publike me kryetarin e bashkisë së Plovdivit, Kostadin Dimitrov, lidhur me vonesat në licencimin e fazës së fundit të punimeve në stadium.

Hetimet për vrasjen vijojnë, ndërsa autoritetet pritet të japin më shumë detaje mbi motivin e krimit dhe personat përgjegjës.