Trajneri i Anglisë, Thomas Tuchel, ka kërkuar përqendrim maksimal nga skuadra e tij përpara sfidës së sotme ndaj Çekisë në Nations League. “Tre Luanët” vijnë në këtë përballje pas fitores spektakolare 7-0 ndaj Kroacisë, por tekniku gjerman paralajmëron se ndeshja e radhës do të jetë një tjetër histori. Tuchel theksoi se Anglia ka pasur më pak kohë për t’u rikuperuar, ndërsa udhëtimi pas ndeshjes së fundit ka ndikuar gjithashtu në përgatitjet e ekipit.
“Ndjesia ime është paksa ndryshe, sepse kemi një ditë më pak në dispozicion dhe kemi pasur edhe një udhëtim me avion mes dy ndeshjeve. Megjithatë, duhet të presim të njëjtin nivel përulësie, qëndrimi dhe intensiteti, si me topin ashtu edhe pa të”, u shpreh Tuchel.
Trajneri i Anglisë kërkoi që skuadra të mos ndikohet nga rezultati i thellë ndaj Kroacisë, duke vlerësuar njëkohësisht kundërshtarin e radhës.
“Kush pret një tjetër fitore të thellë, gabon. Nuk duhet ta presim një rezultat të tillë, sepse kemi përballë një skenar tjetër. Çekia i ka shkaktuar shumë probleme Spanjës dhe kemi parë një përmirësim të qartë të skuadrës së tyre. Rezultatet nuk e pasqyrojnë plotësisht këtë përmirësim”, deklaroi gjermani.
Tuchel nënvizoi se objektivi është që Anglia të ruajë të njëjtin nivel performance, pavarësisht ndryshimit të kundërshtarit.
“Ajo që ndodhi ndaj Kroacisë ishte shumë, shumë e mirë. Duam të ndikojmë në të njëjtin nivel në aspektet ku mund të ndërhyjmë. Na ka mbetur edhe një ndeshje dhe shpresoj se do të mund ta mbyllim në atë nivel”, tha ai.
Sa i përket Çekisë, Tuchel vlerësoi progresin e ekipit dhe evidentoi disa elemente që i kujtojnë stilin e futbollit spanjoll.
“Te Çekia shohim elemente të stilit spanjoll. Nuk do të flas hapur për ndonjë dobësi. Ne përpiqemi gjithmonë të gjejmë hapësira kur analizojmë kundërshtarët dhe të kërkojmë avantazhe për veten tonë, por skuadra çeke ka bërë shumë përparim. Kjo është sfida që na pret”, theksoi trajneri.