“Tym gri” për Igli Taren te Milani, Furlani nuk është i bindur për shqiptarin

Giorgio Furlani vazhdon të analizojë opsionet për drejtuesin e ardhshëm sportiv të Milanit, por pa një vendim përfundimtar. Takimi me ish-drejtorin e Lazios, Igli Tare, nuk ka bindur plotësisht menaxherin kuqezi, i cili vijon të shpresojë për një tjetër profil: Tony D’Amico i Atalantës.

Për këtë arsye, bisedimet me Taren kanë sjellë vetëm një “tym gri”, me klubin që pret të sigurojë matematikisht kualifikimin në Ligën e Kampionëve për të tentuar seriozisht D’Amicon dhe për të negociuar me familjen Percassi për largimin e tij nga Bergamo.

Megjithatë, pista që çon te drejtori sportiv i Atalantës është komplekse. D’Amico është tashmë i përfshirë në planet për sezonin e ardhshëm dhe po punon ngushtë me John Murtough, ish-Manchester United, i cili do t’i raportojë drejtpërdrejt atij.

Për më tepër, D’Amico ka një kontratë që skadon në vitin 2027, të nënshkruar vetëm verën e kaluar. Ashtu si në rastin e trajnerit Gasperini, vetëm një ndërhyrje nga pronarët mund të bëjë ndryshimin.