UEFA i kundërpërgjigjet Superligës Europiane, miraton Championsin e ri

Komiteti Ekzekutiv i UEFA-s, i mbledhur sot në Montreaux, ka aprovuar formatin e ri të kompeticionit, që do të lindë duke filluar nga sezoni 2024/25. Në të do të marrin pjesë 36 skuadra, të mbledhura në një grup të vetëm, që në fazën e parë do të luajnë 10 ndeshje secila përmes shortit. 8 të parat do të kalojnë direkt në fazën me eliminim (që do të jetë njësoj me këtë aktual), ndërsa ato nga vendi i 9 në të 24 do të diskutojnë playoff për të përcaktuar tetë skuadrat e tjera që do të kualifikohen për 1/8 e finaleve.

Kjo lëvizje e UEFA-s ka ardhur vetëm një ditë pas lindjes së Super League, që rrezikon të përfaqësojë një goditje të rëndë në të ardhmen e asaj që, për momentin, është kompeticioni më i rëndësishëm europian për klube. Anglia, Spanja, Gjermania e Italia do të ruajnë katër vendet secila në Champions-in e ri, ndërsa Francës do ti garantohen tre.

Shorti për zhvillimin e mini-turneut të fazës së parë do të bëhen në bazë të renditjes UEFA-s, duke i ndarë 36 pjesëmarrësit në 4 vazo. Ndryshimi i formulës është aprovuar unanimisht e ka votuar në favor edhe Paris Saint Germain, që nuk është në mesin e ekipeve “rebele” së bashku me Bayernin.

Detajet e formatit

Duke e rritur nga 32 në 36 numrin e përgjithshëm të ekipeve pjesëmarrëse në UEFA Champions League, ndryshimi më i madh do të shohë një transformim nga faza e grupeve tradicionale në një fazë të vetme të ligës, që përfshin të gjitha ekipet pjesëmarrëse. Çdo klubi tani e tutje do t’i garantohen së paku 10 ndeshje në këtë turne kundër 10 kundërshtarëve të ndryshëm (pesë ndeshje në shtëpi, pesë jashtë), ndërsa deri tani ka pasur të garantuar të paktën 6 ndeshje kundër 3 rivalëve, të luajtura në shtëpi dhe jashtë fushe.

Tetë skuadrat më të mira në këtë ligë do të kualifikohen automatikisht për në fazën e eliminimit direkt, ndërsa ekipet që renditen nga vendin i 9-të e deri në të 24-tin do të garojnë në një play-off me sistem vajtje-ardhje për të siguruar rrugën e tyre drejt 16-shes më të mirë të turneut. Ndryshime të ngjashme të formatit do të zbatohen gjithashtu në UEFA Europa League (8 ndeshje në fazën e ligës) dhe UEFA Europa Conference League (6 ndeshje në fazën e ligës). Në varësi të diskutimeve dhe marrëveshjeve të mëtejshme, këto dy turne mund të zgjerohen me nga 36 skuadra pjesëmarrëse secila. Kualifikimi për në UEFA Champions League do të vazhdojë të jetë i hapur dhe i fituar përmes paraqitjes së një skuadre në garat vendase. Një nga vendet shtesë do të shkojë për klubin e renditur në vendin e tretë në kampionatin e federatës që pozicionohet e pesta në renditjen e federatave anëtare të UEFA-s. Një tjetër do t’i jepet një kampioni vendas, duke shtuar nga katër në pesë numrin e klubeve që kualifikohen përmes të ashtuquajturës “Rrugës së Kampionëve” (Champions Path).

Dy vendet e fundit do të shkojnë për klubet që kanë pasur koeficientin më të lartë në renditjen e klubeve përgjatë pesë viteve të fundit e që nuk janë kualifikuar në fazën e grupeve të Champions League, por janë kualifikuar ose në fazën kualifikuese të Champions League, Europa League ose Europa Conference League. Të gjitha ndeshjet para finales do të luhen sërish në mesjavë, duke njohur rëndësinë e kalendarit vendas të futbollit në të gjithë Evropën.