VIDEO/ Me këtë gol kundër Barcelonës ylli i Real Madridit theu një rekord të pabesueshëm

Marco Asensio ka një të ardhme të ndritur. Talenti i “Los Blancos” shpërtheu ndaj Barcelonës, duke shënuar një gol spektakolar në fund të ndeshjes, ku Reali triumfoi 3-1 në “Camp Nou”.

Asensio u bë lojtari i parë që shënon gol në debutim në pesë gara të ndryshme. Fillimisht ka debutuar me gol në Superkupën e Europës duke shënuar gol të bukur ndaj Sevillas. Më pas spanjolli sipas Express shënoi në debutim në La Liga kundër Real Sociedadit.

Në Ligën e Kampionëve ai debutoi ndaj Legia Warsaw në “Santiago Bernabeu”, ku gjeti gjithashtu golin, ndërsa në Copa del Rey, Asensio debutoi me gol ndaj Cultural Leonesa. Së fundmi debutoi me gol në Superkupë kundër Barcelonës.

Sytë janë të gjithë tek ai, nëse do ta bëjë këtë edhe në Kupën e Botës për Klube në dhjetor, duke kompletuar me gol debutimin në gjashtë garat e mundshme.