Autoriteti Kombëtar për Sigurinë Kibernetike (AKSK) informon se në disa rajone po konstatohen probleme me aksesin dhe funksionimin e shërbimeve Outlook, Teams dhe Azure. Sipas informacionit të raportuar nga Microsoft, ndërprerjet janë pasojë e ngarkesës së lartë në infrastrukturën e kompanisë dhe nuk lidhen me një incident kibernetik. AKSK po ndjek situatën dhe do të informojë mbi zhvillimet e mëtejshme.
Kjo situatë mund të shfrytëzohet nga aktorë keqdashës për të mashtruar përdoruesit, duke ofruar ndihmë të rreme për rikthimin e aksesit në shërbime. AKSK u bën thirrje përdoruesve të tregojnë kujdes të shtuar ndaj:
▪️ Email-eve që kërkojnë “rivendosje të fjalëkalimit Microsoft”.
▪️ SMS-ve për “llogari të bllokuar” dhe kërkojnë veprime të menjëhershme.
▪️ Telefonatave nga persona që paraqiten si “IT support” dhe ofrojnë ndihmë për rikthimin e aksesit.
Për të mbrojtur të dhënat dhe llogaritë tuaja, AKSK rekomandon:
▪️ Mos klikoni lidhje të dyshimta për hyrje në llogari apo rivendosje fjalëkalimi. Aksesoni shërbimet drejtpërdrejt përmes faqeve ose aplikacioneve zyrtare.
▪️ Mos ndani fjalëkalime, kode verifikimi apo të dhëna të tjera konfidenciale dhe mos u jepni akses në pajisjet tuaja personave të paverifikuar.
▪️ Verifikoni çdo kërkesë për ndërhyrje teknike me stafin IT të institucionit ose kompanisë suaj.
▪️ Informoni stafin për rrezikun e këtyre mashtrimeve dhe kontrolloni masat e parashikuara në planin e vazhdimësisë së punës, përfshirë aksesin në kopjet rezervë të dokumenteve kritike dhe përdorimin e kanaleve alternative të komunikimit.
Raportoni çdo aktivitet të dyshimtë pranë AKSK-së në [email protected].