Gjergj Luca apelon nga “Muzeu i Besimeve” në Fier: “Mos i turpëroni ata atdhetarë që u flijuan për këtë tokë”

Nga Albert Vataj
Në një klimë të ngarkuar politike dhe shoqërore, sipërmarrësi Gjergj Luca ka zgjedhur t’i drejtohet opinionit publik me një mesazh që, sipas tij, shkon përtej përplasjeve të ditës. Nga kompleksi i ri Rozafa Apollonia në Fier, aty ku po merr formë një nga investimet e tij më të veçanta, ai ka bërë thirrje për qetësi, reflektim dhe respekt ndaj historisë kombëtare.

“Është vapë politike, është vapë fizike dhe ky vend, më shumë se kurrë, ka nevojë për paqe. Paqen njeriu e gjen te Zoti dhe te puna. Ju përshëndes nga ‘Muzeu i Besimeve’, që shumë shpejt do të përurohet në kompleksin e ri Rozafa Apollonia në Fier”, shprehet Luca në tektin që shoqëron videomesazhin e publikuar në rrjetet sociale.

Mesazhi i tij nuk i drejtohet vetëm protestuesve apo aktorëve politikë, por çdo shqiptari që pret më shumë nga vendi i vet sesa pyet veten se çfarë ka bërë ai vetë për Shqipërinë. Është një ftesë për të kthyer vëmendjen nga përgjegjësia qytetare, puna dhe ndërtimi i së ardhmes, në vend të përçarjes dhe konfliktit.
Luca e ka zgjedhur me simbolikë vendin nga ku flet. Brenda kompleksit të ri po ndërtohet ajo që ai e quan “Muzeu i Besimeve”, një hapësirë kushtuar figurave të shquara të historisë shqiptare, patriotëve, martirëve dhe idealistëve që, sakrifikuan pasurinë, dijen, jetën dhe lirinë për kombin.

Duke treguar një murale monumentale, ku brenda flamurit kombëtar janë pikturuar portretet e dhjetëra figurave të shquara të shqiptarisë, Luca ndalet me emocion përpara veprës që e konsideron “monumentin e shpirtit” të tij.
“A i njihni ata burra?” pyet ai, ndërsa tregon portretet. “A i njihni ata martirë që sakrifikuan jetën në burgje, që u vranë nga komunizmi, që ishin idealistë dhe shkrinë pasurinë, shpirtin e dijen e tyre për Shqipërinë?”
Në vijim të mesazhit të tij, ai kujton edhe fatin tragjik të shumë patriotëve që, u larguan nga kjo jetë të zhgënjyer, duke parë se idealet për të cilat luftuan shpesh u tradhtuan nga interesa të ngushta politike apo personale.

“Ky është monumenti i shpirtit tim,” thotë Luca. “Mos i turpëroni këta njerëz. Mos e shkelni amanetin e tyre.”
Sipas sipërmarrësit, edhe sot ekzistojnë forca që ushqehen me përçarjen, konfliktin dhe destabilizimin, duke penguar zhvillimin e vendit.
“Edhe sot është kjo e keqe që zgjohet për të shkatërruar atë që është ndërtuar me mund, sakrificë dhe ëndrra. Ata që nuk e duan Shqipërinë, që nuk ia duan të ardhmen këtij vendi, që duan të shkelin mbi gjakun, mundin dhe amanetin e këtyre martirëve, bëhen nxitës të çdo të keqeje që nuk na lë të ecim përpara.”
Në përfundim të mesazhit të tij, Luca u bën thirrje të gjithë shqiptarëve, pavarësisht bindjeve politike apo pozicionit që mbajnë në jetën publike.

Nga ky tempull i kujtesës kombëtare, ai fton qytetarët, protestuesit, politikën, qeverinë dhe opozitën të reflektojnë mbi sakrificat e atyre që ndërtuan themelet e shtetit shqiptar dhe të mos bëhen, me vetëdije apo pa vetëdije, instrumente të interesave që cenojnë të ardhmen e vendit.

“Përpara se të jemi kundërshtarë politikë, jemi bij të së njëjtës tokë. Përpara se të kemi bindje të ndryshme, kemi një histori që na bashkon. Le të jemi mirënjohës ndaj atyre që dhanë gjithçka për Shqipërinë dhe të mos lejojmë që përçarja të fitojë mbi amanetin e tyre”, është thelbi i apelit që Gjergj Luca përcjell nga “Muzeu i Besimeve”, një projekt që synon të jetë jo vetëm një hapësirë ekspozimi, por edhe një vend reflektimi mbi kujtesën, identitetin dhe përgjegjësinë kombëtare.