Basha: Rama çfarë e thotë në drekë nuk e thotë në darkë! Ai punon për oligarkët
Kryetari i Partisë Demokratike, Lulzim Basha ka reaguar pas akuzave që Edi Rama bëri në adresë të opozitës. Kreu i PD-së shprehet se kërkesat e opozitës kanë për bazë vetëm ndihmën ndaj qytetarëve që janë më të prekur nga pandemia e koronavirusit. Ndërsa shton se Edi Rama atë që deklaron në mëngjes e ndryshon në darkë.
“Fyerjet dhe sharjet ndaj opozitës tregojnë se kryeministri nervoz nuk ka as ide dhe as plan masash për emergjencën. Çfarë thotë në drekë, e ndryshon në darkë! Ai sot po tregon se nuk ka hallin e shqiptarëve por ka vetëm merakun e oligarkëve”,- shprehet kreu i PD-së.
Basha shton se “për t’ju ardhur në ndihmë njerëzve, kemi kërkuar që qeveria të subvencionojë qiratë dhe pagesat e qytetarëve dhe bizneseve në nevojë, ashtu si kanë bërë shumë vende duke nisur me Kosovën. Boll me fyerje dhe sulme ordinere: ato nuk i mbushin xhepat dhe tryezat bosh të shqiptarëve”.
Në emër të opozitës, Basha shprehet se qeveria duhet të anulojë menjëherë koncesionet dhe të rialokojë buxhetin.
“Qeveria të anullojë MENJËHERË koncesionet, të rialokojë buxhetin dhe të shtojë pa vonesë fondet e emergjencës në ndihmë të shëndetit dhe njerëzve dhe bizneseve në nevojë. Koha nuk pret!”,- deklaron kryetari i Partisë Demokratike.