“BMW X5”-a përfundon në kanal pranë Ujit të Ftohtë, vdes 17 vjeçari

Një 17 vjeçar ka gjetur vdekjen në një aksident rrugor që ndodhi rreth orës 23:50 minuta të natës së shkuar në zonën e Vlorës.

Policia lokale sqaron se një automjet tip BMV X6, ka dalë nga rruga në aksin rrugor Uji i Ftohtë-Skelë, duke përfunduar në një kanal.

Për pasojë, ka gjetur vdekjen shtetasi Kristi Panajoti, pasagjer në automjet, ndërsa ka mbetur i plagosur rëndë shtetasi Petro Bejo.

“Për pasojë kanë marrë dëmtime të rënda drejtuesi i mjetit, shtetasi P.B., 21 vjeç, banues në Vlorë, bashkë me një pasagjer, të cilët u dërguan menjëherë në Spitalin e Vlorës, por rreth orës 00:05, Spitali ka konfirmuar humbjen e jetës së pasagjerit. Policia ka identifikuar viktimën me gjeneralitetet K.P., 17 vjeç, banues në Vlorë”, sqaron policia në komunikatë.

Grupi hetimor ndodhet në vendngjarje duke kryer veprimet e mëtejshme hetimore për sqarimin e rrethanave të aksidentit.

/Ora News/