Bulqizë, tentojnë të vjedhin kazinonë, autorët i vënë flakën makinës

Një kazino është tentuar të vidhet në qytetin e Bulqizës.

Sipas policisë “ngjarja ka ndodhur mëngjesin e 30 tetorit, ku persona të paidentifikuar nëpërmjet portës së pasme kanë hapur derën pa dëmtime (me çelës),  dhe janë futur  brenda sallës së lojrave të fatit, në pronësi të shtetasit R.K, 43 vjeç, ku kanë kontrolluar për vlera monetare por nuk kanë mundur të marrin asgjë”, sqaron policia.

Ndërkohë policia thotë se ka marrë informacion, se në aksin rrugor Maqellarë-Shupenzë, në anë të rrugës është konstatuar një automjet i djegur, e cila dyshohet se i përket autorëve që tentuan të grabisnin kazinonë.

“Grupi hetimor ka shkuar në vendin e ngjarjes ku  në vendin e quajtur “Maranicë”,  aksi rrugor Maqëllarë – Shupenzë, rreth  200 metra në anën e majtë të rrugës  është konstatuar  një mjet  tip “Mercedez-Benz” , me targa TR 8692 F, i djegur plotësisht,  në pronësi të shtetasit S.P,  banues në Tiranë. Ky automjet dyshohet  të jetë përdorur nga autorët që tentuan të vidhnin kazinon në qytetin e Bulqizës”, tha policia.

Specialistët e policisë po punojnë për zbardhjen dhe dokumentimin e plotë të kësaj  ngjarje, identifikimin dhe kapjen e autorit/ëve.

Materialet i kaluan  Prokurorisë Rrethit Gjyqësor  Dibër për veprat penale ” Shkatrrim i pronës me zjarr”, “Vjedhje me dhunë e mbetur në tentativë”, parashikuar nga nenet 151, 139, 22 të Kodit Penal.