Buxheti për Shëndetësinë/ Manastirliu: Dyfishojmë investimet dhe rrisim bonusin për mjekët

Në buxhetin e Ministrisë së Shëndetësisë për vitin 2018 parashikohet një dyfishim i investimeve në Shëndetësi rreth 3 miliard lekë bashkë me investimet e huaja. Këtë fakt e ka bërë me dije vetë ministrja, Ogerta Manastirliu dje në Komisionin Parlamentar të Shëndetësisë.

Sipas saj, “Buxheti i Shëndetësisë dhe Mbrojtjes Sociale për vitin 2018 parashikohet të jetë 73 miliard e 80 milion lekë ose 4.43% i Prodhimit të Brendshëm Bruto”.

I ndarë, në dy fushat e aktivitetit të Ministrisë së Shëndetësisë dhe Mbrojtjes Sociale, për Shëndetësinë do të financohen 49 miliard e 294 milion lekë ose 2.98% të PBB, ndërsa për Mbrojtjen Sociale do të financohen 23 miliard 785 milion e 750 mije lekë.

Për vitin 2018 Ministria e Shëndetësisë dhe Mbrojtjes Sociale parashikon të zbatojë edhe disa politika më të shënjestruara për shpërblimin e punës së mjekëve sidomos në ato zona ku kemi mungesë mjekësh. Për motivimin e dërgimit të mjekëve në këto zona Ministria e Shëndetësisë dhe e Mbrojtjes Sociale, do të paguajë paga dhe bonuse motivuese, 200,000 deri 250,000 lekë në muaj.

Ministrja theksoi se pritet të ketë rritje pagash, duke filluar nga korriku 2018. Përfitues i rritjes deri 5% do të jenë rreth 18 mijë mjekë dhe infermierë.